اوخولون بیرینجی گونو

 اوخولون ایلک گونو

آی او گونلر، نه گؤزل گونلریدی. اوچ آی یای تعطیلیندن سونرا، مدرسه لر آچیلیردی. سئوینجک اویانیب، حاضیرلانیردیم. دفتر، مداد، مداد سیلن، مداد قددین، سو قومقوماسی، پنیر – چؤرک بلله سی، بیرده آنامین تیکدیغی ال دسمالی، هامیسینی کیفیمه قویوب، آتامین الیندن توتوب، مدرسیه گئتمک اوچون ائودن چیخیردیم. ایلک گون آنام هامیمیزی قرآن آلتیندان کئچیردیردی. قرآن کریمی اؤپوپ سورا، ائودن چیخیردیق. آنام خیرداپوللاری تصدق اوچون چیخیب، تاخچادا بیر نعلبکی نین ایچینه قویوردو.
آنامین اولدوزکیمی پاریلدایان گؤزلری، امیدنن باخیب، منه باشاریلی اولماق یولون و آتامین ایستی و یوموشاق و گوجلو اللرینین ایستی سی و گؤنجی، ان گوجلو و مهربان اورکلی اولماغین یولون گؤرسدیر.
آنام دییردی:« اوخویون، اؤز الیز اؤزجیبیز اولسون. اوخویون حرمتیز چوخ اولسون. اوخویون قئیین – قودا یانیندا باشیز اوجا اولسون.»
آتام دئیردی:« اوخویون یولوز آچیق اولسون. اوخویون قازانجیز چوخ اولسون. اوخویون گله جکده ان یاخجی ائولادلار تربیت ائیله یین.»
*
دستمال: بوندان قدیم حاضیر دستمال لار یوخویدو. اولسایدی دا باهایدی و هر زامان آلماق اولمازدی. اونون اوچون آنالاریمیز تازا چادرا تیکن ده، بوجاقلاریندا قالان پارچادان بیزه دستمال تیکردیلر. کهنه اولان پالتارلاری، چادرالاری دا آتمازدیلار. اونلارین دا پوزولمامیش یئرلرین کسیب دستمال تیکردیلر. هر گون مدرسه دن ائوه گلدیغیمیزده، دستمالیمیزی صابونلاییب، آساردیق.
بوندان قدیم مدرسه لرده بیز اوشاقلار هامیمیز بیریدیک. بس ها بس یوخویدو. هئچ کیم تازا مدل، تازا مارک، تازاو... بیلمیردیک. هامیمیز بیر بوی دا بیر بویادایدیق.
آی او چاغلار، نه گؤزل چاغلاریدی.