اسماعیل قارداش ، بیر جواب
اورگی یانیخلی داغلی باجیندان
قبول ائله بیر ریاسیز سلامی
قارانلیقلار ایچیندن گلن های دان
تحویل آل بیر نئچه کلام جوابی
...
بوکولوب قامتیم یاشام یولوندا
سلامه گلیب توکلریم باشیمدا
سوروشاسان بو اینجه اوره ییمده ن
نئجه تاب گتیریم آخیر ظولوما
...
گؤزل یازدین آروادلارین حاققیندا
اوتورتدون هامیسین جئیران داغیندا
الین قولون وار اولسون کی بیرداها
سرین سو سپدین تاریخ یاراسینا
...
گؤزللیکین آدی آرواددیر دئدین
سئوگینین دادی دا آرواددیر دئدین
یاشامین سئوینجی آرواددیر دئدین
ساباهین شنلیگی آرواددیر دئدین
...
عطیر ساچان گوله به نزه تدین ساغ اول
دادلی شیرین بالا به نزه تدین ساغ اول
یاشیل باشلی سونا اولدوم شعرینده
جنت حوری سینه بنزه تدین ساغ اول
...
سنه بیرخیرداجا سؤزوم وار ائشیت
بیر قارداش باجیسین ائشیدن کیمی
قوی دردله شیم سنینله آی قارداشیم
بیر باجی قارداشلا دردله شن کیمی
...
نئیلیرم دیله گتیریب یازاسان
نه واخت خوشووا گلمدی پوزاسان
نئیلیرم گاهی داغا میندیرسن
گاهدا به یه نمییب یئره چالاسان
...
یورولموشام بال تک شیرین اولماقدان
دای پیخمیشام گول تک عطیر ساچماقدان
تومارلاییب بویوما اوخشاماقلا
اوبیرسی دونیادا پری اولماقدان
...
ییغیشدیر سؤز بیربیرینه دوزمه یی
آروادی سؤزلوکلرله به زه مه یی
بتردن اورهگین یانسا گر منه
اؤزون کیمی اینسان گؤره رسن منی
( هشتم مارس سال 2006 در جواب شعر اسماعیل جمیلی )
شهربانو ( قایاقیزی )
No comments:
Post a Comment