گربۀ زرد گل صنم - گول صنمین ساری پیشیی
سیاه مشق های یک معلم - دفتر دوم
*
یان قونشوموزون بیر ساری پیشیگی وار. او هرگون ایشه
گئدیر. پیشیک ایسه جامین دالیسیندا اوتوروب، گلیب – گئده نه باخیر.آخشاملار خانیم
ائوه گلیب قاپینی آچدیقدا، اودا اؤزون ائشییه آتیب بیر اویان – بویانی گزمک
ایستیر. خانیم تئز دالیسیجا گئدیب یازیغی ائوه قایتاریر. یازیق دیلسیز – آغیزسیز
پیشیگه چوخ اوره ییم یانیر. خانیم هفته نین سون گونو، چرخینی ده گؤتوروب، پیشیگی
چرخین دالیسیندا سبد ده اوتوردوب آلیش – وئریشه گئدیر. پیشیگین گؤزلرینده سئوینجی گؤروره م.
گل صنم بو پیشیگه و اوبیرسی جاناوار لارا باخاندا دئییر:« نئجه دئییریک آللاه آداما شانس وئره باختاوار ائیلیه، کاشکی حیوانلارادا شانس وئره. بوردا یاشیان ایت – پیشیکلر چوخ باختاواردیلار. یئمک لری، ایچمک لری، بیسکویت، سوموک، نه بیلیم هرنه لری واردیر. ییه لری ده مهربان دیر. بیزیم اورالاردا حیوانلار ائشیک ده قالیرلار. قیشین سویوغوندا ماشینلارین آلتینا سیغینیرلار. چوخودا اؤلورلر. بو ساری پیشیگی گؤرنده، اؤز ساری پیشیگیم یادیما دوشور.
بؤیوک ائویمیز واریدی. بؤیوک حیاط، بؤیوک حاووض، بؤیوک زیرزمین. زیرزمی نین بیر بؤیوک اتاقی مطباخیدی. مطباغین اورتاسیندا بیر دؤرد بوجاق حاووض واریدی. بو حاووض هر زامان سویلا دولویدو. سولار کسیلنده آنام او سوینان قاب قاشیق یویاردی. اوزون سؤزون قیسساسی کی اورا بیزیم آب انباریمیزیدی. بیر بؤیوک اتاق دا آنباریدی. اورا خیر – خشک، ها بئله سوبا، پیره مئس و... ییغمیشدیق. بیرخیردا اتاقدا بوش اویدو. او اتاقین قاپیسی آچیق ایدی. بیر بوجاقدا سو قابی، اونون یانیندا دا بیر درین بشقاب واریدی. او بشقابین ایچینه سوموک، قاتیق، سوت، هابئله پیشیک لر نه یئسه، تؤکردیک. قیشدا دا پیشکیمیز اوردا یاتیب سویوقدان – قاردان قورتولاردی. بیزیم پیشیک بیر پئکه قارین، قپ قره پیشیک ایدی. بیر گون اویاناندا چوخ اینجه سس ائشیتدیک. بؤیوکآنام گوله – گوله دئدی:« اوشاقلار دورون، پیشییمیز اوغلان دوغوب.»
ال – اوز یومادان زیرزمینه قاچدیق. پیشییمیز بیر یوخ بلکی اوچ بالا دوغموشدو. ایکیسی قپ – قره، بیری ایسه ساپ – ساریدی. ساری پیشیگی قوجاغیما آلیب اتاقیما آپارماق ایسته دیم. بؤیوک آنام قاباغیمدا دوروب دئدی:« ساری پیشیک سنین. اما بوردا قالاجاق. آناسی سوت وئره جک. آناسینین یانیندا قالاجاق. اویناتماق ایسته دیین ده، بورایا گلیب اوینادیرسان.»
بؤیوک آنامین سؤزونه باش اوسته دئدیم. بیزیم چاغدا بؤیوکلرین حرمتی – سایقی سی واریدی. کیمسه جواب قئیتره بیلمزدی.
گونلرین بیر گونونده یولداشلاردان بیری، بیر گؤیرچین تاپدی. یازیق گؤیرچینین قانادی قانلیدی. اوچابیلمیردی. اونو حیوانات دؤحتورونه آپاریب، اوردا ساخلییب، توختادان دان سونرا بوراخمیشدیلار. قضادان منیم ساری پیشیگیم ده آخسیردی. آیاغینا بیر زاد اولموشدو. مدرسه دن قاییدیب، بؤیوک آنامدان بیر سبد آلدیم. پیشیگی سبده قویوب ائودن چیخیردیم کی آتام کوچه قاپیسین آچیب ایچری گیردی.
سلام وئردیکدن سونرا، دئدیم:« آقا جان پیشیک ناخوشلویوب آیاغی آخسیر. آپاریرام حیوانات دؤحتورونه.»
آقا جانیمی دئییرسن؟ فیشفیشا کیمی گؤیه گئتدی:« نه دئدین! نه دئدین!؟ گؤزلریم آیدین نه حیوانات دؤحتورو؟»
دئدیم آقا جان حیوانات دؤحتورونون مطبی آچیلیب. یولداشیم دا گؤیرچینین آپار…»
سؤزومو آغزیمدا قویوب دئدی:« یولداشین… یئییب کندینین کدخوداسینان. لازیم ائیله مییب! او کیشی مال – داوار، قویون – قوزو، تویوق – خوروز دوحتورودو. پیشیک – میشیک یوخ. یولداشینه نه غلط دارتسا، سن ده دارتاجاقسان؟»
دئدیم:« آما آقا جان بو پیشیک ده آخسیر یازیق دی. هلبت جانی آغریر.»
دئدی:« آغریسین دا نه اولاجاق؟ خنجرینین قاشی دوشه جک؟ پیشیک دی بیر- ایکی گوندن سونرا، اؤز – اؤزونه توختار. یالانچی لیق دان گئدیب دؤحتورون ده باشین آغریتمایین. چوخ حیوان ساخلیانلارین، مال – داواری ناخوشلوقدان قیریلیر. یازیقلار زیان گؤرور. پیشک توختاتماق چاغی دئییر. اوتور، اوتوردوغون یئرده. یوخسا قیشلارینی سیندیررام ها!»
سونرا دئیینه – دئیینه دستاماز آلماغا گئدی:« ماغیل! یارالی بارماغا ایشه میرلر، جر – جناوارا اوره ک یاندیریرلار. هله قونشولار گؤسه نه دئیر؟ شهره بیر جاوان دؤحتور گلیب قیزین دا دوشوب دالیسیجا! آدام دا آبیر – اوزم قالماز.»
اولابیلیرکی بابام حاقلی اولموش اولا. بیزیم چاغدا ایت – پیشیگی دؤحتوره آپارمازدیلار. آقا جانیمین دئیدگی کیمی بیر نئچه گوندن سونرا پیشیک توختادی و آخسامادان یولون گئتدی.
گونلرین بیر گونو منیم ساری پیشییم گئتدی بیرداها گلمدی. هر یئری آختاردیم. هرکیمدن سراغینی آلدیم. آنجاق تاپانمادیم کی تاپانمادیم. او گون پیشیک گئتدی کی گئتدی. بؤیوک آنام منیم اوزولدوغومو گؤروب دئدی:« غم یئمه، اولابیلیر کی بیزیم زیرزمینیمیزدن یاخجی یئر تاپیب.»
پیشک گئتدی، منیم گؤزوم یولدا قالدی. آخیر ایتیک چتین اولار. ایندی نین ایندی سی ده هاردا ساری پیشیک گؤرورم دئییرم اولما منیم ساری پیشییم دیر.
*
گربۀ زرد گل صنم- فارسی
*
گل صنم بو پیشیگه و اوبیرسی جاناوار لارا باخاندا دئییر:« نئجه دئییریک آللاه آداما شانس وئره باختاوار ائیلیه، کاشکی حیوانلارادا شانس وئره. بوردا یاشیان ایت – پیشیکلر چوخ باختاواردیلار. یئمک لری، ایچمک لری، بیسکویت، سوموک، نه بیلیم هرنه لری واردیر. ییه لری ده مهربان دیر. بیزیم اورالاردا حیوانلار ائشیک ده قالیرلار. قیشین سویوغوندا ماشینلارین آلتینا سیغینیرلار. چوخودا اؤلورلر. بو ساری پیشیگی گؤرنده، اؤز ساری پیشیگیم یادیما دوشور.
بؤیوک ائویمیز واریدی. بؤیوک حیاط، بؤیوک حاووض، بؤیوک زیرزمین. زیرزمی نین بیر بؤیوک اتاقی مطباخیدی. مطباغین اورتاسیندا بیر دؤرد بوجاق حاووض واریدی. بو حاووض هر زامان سویلا دولویدو. سولار کسیلنده آنام او سوینان قاب قاشیق یویاردی. اوزون سؤزون قیسساسی کی اورا بیزیم آب انباریمیزیدی. بیر بؤیوک اتاق دا آنباریدی. اورا خیر – خشک، ها بئله سوبا، پیره مئس و... ییغمیشدیق. بیرخیردا اتاقدا بوش اویدو. او اتاقین قاپیسی آچیق ایدی. بیر بوجاقدا سو قابی، اونون یانیندا دا بیر درین بشقاب واریدی. او بشقابین ایچینه سوموک، قاتیق، سوت، هابئله پیشیک لر نه یئسه، تؤکردیک. قیشدا دا پیشکیمیز اوردا یاتیب سویوقدان – قاردان قورتولاردی. بیزیم پیشیک بیر پئکه قارین، قپ قره پیشیک ایدی. بیر گون اویاناندا چوخ اینجه سس ائشیتدیک. بؤیوکآنام گوله – گوله دئدی:« اوشاقلار دورون، پیشییمیز اوغلان دوغوب.»
ال – اوز یومادان زیرزمینه قاچدیق. پیشییمیز بیر یوخ بلکی اوچ بالا دوغموشدو. ایکیسی قپ – قره، بیری ایسه ساپ – ساریدی. ساری پیشیگی قوجاغیما آلیب اتاقیما آپارماق ایسته دیم. بؤیوک آنام قاباغیمدا دوروب دئدی:« ساری پیشیک سنین. اما بوردا قالاجاق. آناسی سوت وئره جک. آناسینین یانیندا قالاجاق. اویناتماق ایسته دیین ده، بورایا گلیب اوینادیرسان.»
بؤیوک آنامین سؤزونه باش اوسته دئدیم. بیزیم چاغدا بؤیوکلرین حرمتی – سایقی سی واریدی. کیمسه جواب قئیتره بیلمزدی.
گونلرین بیر گونونده یولداشلاردان بیری، بیر گؤیرچین تاپدی. یازیق گؤیرچینین قانادی قانلیدی. اوچابیلمیردی. اونو حیوانات دؤحتورونه آپاریب، اوردا ساخلییب، توختادان دان سونرا بوراخمیشدیلار. قضادان منیم ساری پیشیگیم ده آخسیردی. آیاغینا بیر زاد اولموشدو. مدرسه دن قاییدیب، بؤیوک آنامدان بیر سبد آلدیم. پیشیگی سبده قویوب ائودن چیخیردیم کی آتام کوچه قاپیسین آچیب ایچری گیردی.
سلام وئردیکدن سونرا، دئدیم:« آقا جان پیشیک ناخوشلویوب آیاغی آخسیر. آپاریرام حیوانات دؤحتورونه.»
آقا جانیمی دئییرسن؟ فیشفیشا کیمی گؤیه گئتدی:« نه دئدین! نه دئدین!؟ گؤزلریم آیدین نه حیوانات دؤحتورو؟»
دئدیم آقا جان حیوانات دؤحتورونون مطبی آچیلیب. یولداشیم دا گؤیرچینین آپار…»
سؤزومو آغزیمدا قویوب دئدی:« یولداشین… یئییب کندینین کدخوداسینان. لازیم ائیله مییب! او کیشی مال – داوار، قویون – قوزو، تویوق – خوروز دوحتورودو. پیشیک – میشیک یوخ. یولداشینه نه غلط دارتسا، سن ده دارتاجاقسان؟»
دئدیم:« آما آقا جان بو پیشیک ده آخسیر یازیق دی. هلبت جانی آغریر.»
دئدی:« آغریسین دا نه اولاجاق؟ خنجرینین قاشی دوشه جک؟ پیشیک دی بیر- ایکی گوندن سونرا، اؤز – اؤزونه توختار. یالانچی لیق دان گئدیب دؤحتورون ده باشین آغریتمایین. چوخ حیوان ساخلیانلارین، مال – داواری ناخوشلوقدان قیریلیر. یازیقلار زیان گؤرور. پیشک توختاتماق چاغی دئییر. اوتور، اوتوردوغون یئرده. یوخسا قیشلارینی سیندیررام ها!»
سونرا دئیینه – دئیینه دستاماز آلماغا گئدی:« ماغیل! یارالی بارماغا ایشه میرلر، جر – جناوارا اوره ک یاندیریرلار. هله قونشولار گؤسه نه دئیر؟ شهره بیر جاوان دؤحتور گلیب قیزین دا دوشوب دالیسیجا! آدام دا آبیر – اوزم قالماز.»
اولابیلیرکی بابام حاقلی اولموش اولا. بیزیم چاغدا ایت – پیشیگی دؤحتوره آپارمازدیلار. آقا جانیمین دئیدگی کیمی بیر نئچه گوندن سونرا پیشیک توختادی و آخسامادان یولون گئتدی.
گونلرین بیر گونو منیم ساری پیشییم گئتدی بیرداها گلمدی. هر یئری آختاردیم. هرکیمدن سراغینی آلدیم. آنجاق تاپانمادیم کی تاپانمادیم. او گون پیشیک گئتدی کی گئتدی. بؤیوک آنام منیم اوزولدوغومو گؤروب دئدی:« غم یئمه، اولابیلیر کی بیزیم زیرزمینیمیزدن یاخجی یئر تاپیب.»
پیشک گئتدی، منیم گؤزوم یولدا قالدی. آخیر ایتیک چتین اولار. ایندی نین ایندی سی ده هاردا ساری پیشیک گؤرورم دئییرم اولما منیم ساری پیشییم دیر.
*
گربۀ زرد گل صنم- فارسی
*
No comments:
Post a Comment